Xigashada Sawirka, Getty Images
Inta badan dhinaca Hollywood marka aad eegto waxa ay indhahaagu qabanayaan qiiq iyo holac weyn. Kuuma suura geleyso inaad nadiif ah u aragto dhammaan geedaha timirta ah ee dhaadheer ee ku teedsan waddooyinka.
Dadka caanka ah ee Hollywood-ka ayaa ka mid ahaa kuwii u ordayay in ay naftooda kala baxsadaan California oo uu dabku faro ba’an ku hayo iyada oo uu sii fidayo, qaar badan ayaase guryohoodii ku waayay.
Waa kuwee dadka caanka ah ee guryahooda waayey?
Jeff Bridges iyo Mel Gibson ayaa ka mid ah dadka caanka ah ee ku guryo beelay dabkii halista ahaa ee ka kacayay Los Angeles.
Jilaaga caanka ah ee Bridges oo u dhashay dalka Maraykanka kuna guulaystay abaal marinta Oscar-ka iyo jilayaagii taxanaha ee TV-ga The Old Man, ayaa waayay gurigii uu ka deganaa Malibu oo isaga iyo walaalihiis ay ka dhaxleen waalidkood.
Maalin ka dib markii uu jilaaga James Woods ka cararay gurigiisa ku yaalla Pacific Palisades, waxa uu yiri “guri kasta oo nagu hareeraysan waa uu gubanayaa.”
Woods, oo ka tirsan kooxda Nixon iyo Casino, Ghosts of Mississippi iyo Any Given Sunday, ayaa warbaahinta u sheegay isaga si aad ah u ooyaya in guri kasta oo ku hareereysan uu holcayay.
Xigashada Sawirka, Getty Images
Xiddigga filimka Oscar-ka ku guuleystay Mel Gibson ayaa sidoo kale shaaca ka qaaday in gurigiisa Malibu “uu si buuxda u bas beelay” xilli uu ku maqnaa duubista podcast-ka Joe Rogan.
Kumanaan dhisme ayaa burburay kadib markii lix dab oo kala duwan ay ka keceen gudaha iyo hareeraha magaalada, oo ay ku badan yihiin guryo ay dagan yihiin xidigaha filimada.
Paris Hilton, Billy Crystal, Adam Brody iyo Milo Ventimiglia ayaa ka mid ah shaqsiyaadka kale ee caanka ah ee guryo beelay.
Ventimiglia, oo si weyn loogu yaqaanay doorkiisa Gilmore Girls iyo Heroes, ayaa laga duubay isagoo ku laabanaya gurigiisa oo gubtay.
“Waxaad bilaabaysaa inaad ka fikirto dhammaan xusuusaha iyo qaybaha kala duwan ee guriga,” ayuu Ventimiglia ku yiri CBS Evening News. “Markaa waxaad arkaysaa guryaha deriskaaga iyo wax kasta oo hareerahaaga ah, waana niyad jabeysaa.”
Rosie O’Donnell, oo hore ula shaqayn jirtay The View, ayaa sidoo kale wayday gurigeeda Malibu.
“Marka la eego PCH (Waddada Xeebta Baasifigga) ee Malibu – dhammaan guryaha hore ee xeebta way gubteen oo uu ku jiro kii aan ku noolaa,” ayay ku soo qortay TikTok.
Qaar ka mid ah burburkii ugu xumaa ayaa ka dhacay deegaanka quruxda badan ee Palisades Pacific.
Qayb ka mid ah xaafadda, oo ah meel ka mid ah waddooyinka buuraleyda ah ee ka soo horjeeda buuraha Santa Monica oo hoos ugu sii dhacaya xeebaha ku teedsan Badweynta Baasifigga, ayaa noqday dambas.
Xigashada Sawirka, Getty Images
Jilaaga Billy Crystal ayaa bayaan uu soo saaray ku sheegay in isaga iyo xaaskiisa Janice ay “niyad jabeen” kadib musiibada ku dhacday gurigoodii Pacific Palisades oo ay ku noolaayeen tan iyo 1979-kii.
The When Harry Met Sally star ayaa bayaan uu soo saaray ku yiri: “Waxaan halkan ku soo korinay carruurtayada iyo carruurta ay dhaleen”.
“Taako kasta oo gurigayaga ah waxaa ka buuxay jacayl iyo xusuus qurux badan oo aan la qaadi karin.
“Dabcan waan niyad jabnay laakiin jacaylka caruurteena iyo saaxiibadayada waan ka gudbi doonaa tan.”
Xiddigaha Hills Spencer Pratt iyo Heidi Montag, kuwaas oo is qabay, ayaa sidoo kale ku waayay gurigooda dabka.
“Waxaan ka daawanayaa gurigayagii oo gubanaya kamaradaha ammaanka,” Pratt ayaa soo dhigay.
Ricki Lake oo daadihiye ka ahayd TV-ga ayaa u sheegtay taageerayaasheeda inay wayday “gurigi riyada”, iyadoo raacisay: “Waan la murugoonayaa dhammaan kuwa dhibaataysan.”
Jilayaasha Sir Anthony Hopkins, John Goodman, Anna Faris iyo Cary Elwes ayaa sidoo kale la sheegay inay guryahooda waayeen.
Miles Teller, oo si weyn loogu yaqaanay doorkiisa Top Gun: Maverick, iyo xaaskiisa, Keleigh Sperry, ayaa la sheegay inay waayeen gurigooda oo ku yaal Pacific Palisades.
Xigashada Sawirka, Getty Images
Xiddigaha kale ee lagu qasbay inay cararaan waxaa ka mid ah jilaaga Star Wars Mark Hamill iyo jilaaga Schitt’s Creek Eugene Levy.
Qoraal uu soo dhigay Instagram-ka, Hamill ayaa dabka ku tilmaamay kii ugu naxdinta badnaa tan iyo 1993-kii, markaasoo 18,000 oo hektar ay gubteen, ayna baabi’iyay 323 guri oo ku yaalla Malibu.
Jamie Lee Curtis waxay sheegtay in gurigeedu nabad yahay balse xaaladdu ay ahayd “mid fool xun”.
Curtis iyo ninkeeda, jilaaga kale ee Christopher Guest, ayaa ballan qaaday $1m (£800,000) “si loo bilaabo sanduuqa taageerada magaaladeena weyn iyo gobolka iyo dadka waaweyn ee ku nool halkaas”.
Dhowr qof oo kale oo caan ah ayaa isaga cararay magaalada si ay uga badbaadaan dabka.
Fanaanada Dua Lipa ayaa qoraal ay soo dhigtay barteeda Instagram-ka ku shaacisay in ay ka carartay magaalada ayna nabad tahay.
Dadka kale ee caanka ah ee guryahoodii waayey sida ay sheegayaan wararka iyo baraha bulshada waxaa ka mid ah.
- John C Reilly
- Cobie Smulders
- John Goldman
- Tina Knowles
- Anthony Hopkins
- Rikki Lake
- Anna Faris
- Jennifer Grey
- Denise Crosby
- Melissa Rivers
- Cary Elwes
- Carolyn Murphy
- Sandra Lee
- Ricki Lake
- Bozoma Saint John
